ગોવિંદો પ્રાણ અમારો

ગોવિંદો પ્રાણ અમારો રે, મને જગ લાગ્યો ખારો રે;

મને મારો રામજી ભાવે રે, બીજો મારી નજરે ના’વે રે…ગોવિંદો પ્રાણ અમારો રે

મીંરાબાઇના મહેલમાં રે, હરિસંતોનો વાસ,

કપટીથી હરિ દૂર વસે, મારા સંતન કેરી પાસ…ગોવિંદો પ્રાણ અમારો રે

રાણોજી કાગળ મોકલે રે, દેજો મીંરાને હાથ,

સાધુની સંગત છોડીને મીરાં, વસો અમારી સાથ…ગોવિંદો પ્રાણ અમારો રે

મીંરાબાઇ કાગળ મોકલે રે, દેજો રાણાજીને હાથ,

રાજપાટ છોડી તમે રાણાજી,વસો સંતોની સાથ…ગોવિંદો પ્રાણ અમારો રે

વિષનાં પ્યાલા રાણાએ મોકલ્યા, દે જો મીંરાને હાથ,

અમૃત માની મીંરા પી ગયાં, જેને સહાય શ્રી વિશ્વનો નાથ…ગોવિંદો પ્રાણ અમારો રે

સાંઢવાળા સાંઢ શણગારજે રે , મારે જાવું સો-સો કોશ,

રાણાજીનાં દેશમાં મારે, જળ રે પીવાનો દોષ…ગોવિંદો પ્રાણ અમારો રે

ડાબો મેલ્યો મેવાડને મીંરા, સંચર્યા પશ્ચિમમાં ય,

સર્વ છોડી મીંરા નીસર્યાં, જેનું માયામાં મનડું ન કાંય…ગોવિંદો પ્રાણ અમારો રે

સાસુ અમારી સુષુમણાને સસ્રો પ્રેમ સંતોષ,

જેઠ જગજીવન જગતમાં, મારો નાવલિયો નિર્દોષ…ગોવિંદો પ્રાણ અમારો રે

ચુંદડી ઓઢું તો રંગ ચૂવે રે, રંગબેરંગી હોય,

ઓઢું હું કાળૉ કામળો બીજો દાગ ન લાગે કોય…ગોવિંદો પ્રાણ અમારો રે

મીંરા હરિની લાડલી રે, રહેતી સંત હજૂર,

સાધુ સંગાથે સ્નેહ ઘણો, પેલા કપટીથી દિલ દૂર…ગોવિંદો પ્રાણ અમારો રે

–મીંરાબાઇ